Ubuntu අයිසිං කිරීම (5කොටස)-Emerald

අයිසිං කිරීම ඉවරයි කියල මං කලින් කිව්වට ඉවරම නෑ. තව තියනවා. :D මේක ලස්සනම එකක් වෙලත් මට කොහොම අමතක උනාද කියල හිතා ගන්න බෑ. කොහොම හරි දැන් මතක් උනානේ ඔන්න ලියනවා.

Emerald කියන්නෙ කවුළු අලංකාර කරනයක්(window decorator). මෙම Emerald theme manager එක මගින් ඔබට emerald themes install කරන්න edit කරන්න සහ emerald theme අතර මාරු වීමට අවස්ථාව ලබා දෙනවා.

Window decorator එකක් විදිහට emerald කරන්නෙ ඔබේ window border වල පෙනුම පාලනය කිරීම. Window එකක අනෙක් අයිතමයන් වෙන button, scroll bars වැනි දේවල් වෙනස් කිරීමට desktop environment එකේ settings වලට යන්න ඕන.

• Emerald ස්ථාපනය කිරීම.

terminal එක ගෙන පහත විධානය ඇතුලත් කරන්න(ඔබේ repository indexes update කර තිබිය යුතුයි)

$ sudo apt-get install emerald

ඊළඟට emerld, CompizConfig Settings Manager වල plug in එකක් විහිදට active කිරීමට. CCSM වලට ගිහින් එකේ Window decoration කොටසට ගිහිල්ලා එතන තියන command කියන text box එකට "emerald --replace" කියල ඇතුලත් කරන්න.

මේක ක්‍රියාත්මක කරන්න නම් පරිගනකය නැවත පණගන්වන්න වෙනවා. ඒ session එකට විතරක් ක්‍රියාත්මක කරන්න නම් Run එකේ emerald --replace ඇතුලක් කරලා පුළුවන්.

• Themes install කිරීම.

System--> Preferences --> Emerald Theme Manager වෙත යන්න.

මේකට කැමති themes www.gnome-look.org වලින් බාගන්න පුළුවන්. (Mac OS වගේ Vista වගේ හදපු ඕනෑ තරම් themes මෙතන තියනවා) ඊට පස්සෙ theme manager එකේ import බොත්තම click කරලා theme එක අරගෙන. ඒ අවශ්‍ය theme එක උඩ double click කරලා ක්‍රියාත්මක කරගන්න පුළුවනි. =D>

Mac OS theme එකක් :)

අර්ධ ශතකය ලැබීම හා ආපසු හැරී බැලීමක්......

ආයුබෝවන් කියල පිළිගන්නවා රවින්දගේ සටහන් පොතේ 50 වැනි සටහනට :) . මම බ්ලොග් කරණයට පිවිසුනේ මීට මාස 10 කට කලින් 2008 දෙසැම්බර් 8 වෙනි සඳුදා. ඒ මගේ විස්තර ගැන කුඩා සටහනක් ලියල. එදා ඉඳල අද වෙනකම් මම දිගටම බ්ලොග් ලිව්ව. සමහර කාල වලදී(විභාගෙ කිට්ටු උනහම ලෙක්චර්ස් ගියේ නැති ඒව නිදි මරාගෙන අදින කාලෙI-) ) ටිකක් මඟ ඇරුනේ නෑම නෙමෙයි. ඒත් මම මේ මුළු කාලය තුලම බ්ලොග්කරණයේ රුඳිල හිටිය. හැමදාම වගේ සින්ඩියටයි ගිහිල්ල බ්ලොග් කියවන්න ඒ වගේම මගේ blogspot එකට feeds ආපු posts කියවන්න පුරුදු උනා. ඒක මගේ දෛනික ජීවිතයේ කොටසක් උනා. net connect උනාම මුලින්ම යැවෙන්නෙ සින්ඩියට. බ්ලොග් කියවීමෙන් ප්‍රතිචාර දැක්වීමෙන් මම තෘප්තියක් ලැබුවා. ඒ වගේම ගොඩක් දේවල් ඉගන ගත්තා.

මම බ්ලොග් එකක් ලියන්න ඕන කියල හිතුනෙ අපේ senior batch එකේ ශාකුන්තල අයියගේ බ්ලොග් එක දැකල. ඒ වගේම තමයි පහන් අයිය. මට මතකයි පහන් අයිය දවසක් අපේ UCSC ගොඩනැගිල්ලෙ පළවෙනි මහලෙ ඉඳල මට මල්ලි මල්ලි කියල කතා කරල "උඹ නේද අර බ්ලොග් එකක් ලියන්නෙ" කියල අහල ඊට පස්සෙ මගේ බ්ලොග් එකේ අඩුපාඩු කියල දීපු හැටි. ඒ අය මට දීපු සහයෝගය මේ වෙලාවෙ මතක් කරන්නම ඕන.

මම UCSC එකේ 6 වෙනි batch එකේ. අපේ කට්ටියගෙන් මුලින්ම බ්ලොග් එකක් ලියන් පටන් ගත්තේ මම. ඒකත් මට බොහොම ආඩම්බරයට කාරණයක්.ඒ වගේම මගේ batch එකේ සාමාජිකයන් comment වලින් වගේම හම්බෙච්ච වෙලාවට වචනයෙන් හරි දීපු ධෛර්ය මට මෙච්චර කාලයක් බ්ලොග් ලියන්න ශක්තියක් උනා. අනික මම බ්ලොග් ලියන්න පටන් අරගෙන නිකං හිටියේ නෑ. අපේ අනිත් එවුනටත් තෙල ගැහුවා බ්ලොග් ලියන්න. ඒ තෙල් වල ප්‍රතිපලයක් විදිහට අපේ ගොඩක් අය බ්ලොග් ලියනවා දැන් =d> . නම් එහෙම කියන්න ගියොත් ලේසි වෙන්නෙ නෑ මොකද බර ගානක් ඉන්න නිසා. පහුගිය දවසක අපේ පොඩි එවුන්ට(පොඩි එවුන් කිව්වට මුන් පොඩිම නෑ ඒ අපේ jouniorsලා :D) අපි Linux workshop එකක් කරපු වෙලාවේ උන්ටත් බ්ලොග් ගැන හොඳ තෙලක් ගැහුවා චමිල අයියයි මායි. ඒ අපේ මල්ලිලා නංගිලාත් ලඟදීම මේ බ්ලොග් කරුවන් අතරට එකතු වේවි කියල තමයි බලාපොරොත්තුව.

බ්ලොග් කරණයෙන් මට ලැබිච්ච තව දෙයක් තමයි තව යාළුවො කට්ටියක්. ඒ නිසා මගේ IM client එකට තව group එකක් එකතු උනා "මගේ බ්ලොග් මිතුරන්" කියල. ඒ අය වගේම මගේ බ්ලොග් එක පැත්තෙ ඇවිල්ල ඒව කියවල ගිය ප්‍රතිචාරයක් දාල ගිය හැම දෙනෙක්මත් මේ වෙලාවෙ බොහොම ආදරෙන් මතක් කරනව.

මම හැමදාම උත්සාහ කල දෙයක් තමයි බ්ලොග් එකෙන් මම දන්න දෙයක් අනුන්ට කියල දෙන්න. මේක අපේ කැම්පස් වල නම් සංස්කෘතියෙම කොටසක්. දේශනයක් ගත්තහම හැමෝටම තේරෙන්නෙ නෑ ඒත් ඒක තේරෙන කීප දෙනා batch එකම ගොඩ දානව. එහෙම කෙනෙක්ට කියල දීල ඌව ගොඩ දාල ලබන තෘප්තිය වෙන කිසිම දේකින් ලබන්න බෑ. ඒක නිසා තමයි මම බ්ලොග් එකෙත් මම දන්න දේවල් ලිව්වෙ. Bandluxe modem එක linux වල configure කරන විදිහ ගැන මම ලියපු සටහන සෑහෙන්න ජනප්‍රිය උනා. කොච්චරද කියනවනම් "bandluxe c120 in" කියල google කලාම මම ucsclodge එකේ කඩ්ඩෙන් ලියපු post එක දෙවනියට ආව. තව පිටරට වල කීප දෙනෙක්ම මට mail කරල, IM එකේ set වෙලා ඒ ගැන වැඩි විස්තර ඇහුව. බ්‍රසීලෙ ලුසියානෝ කියන පොර තාමත් මම online හිටියහම linux ගැන එක එක දේවල් අහනව #-o . මම ඉතින් ගොඩක් FOSS පැත්තට බර නිසා ඒ ලියැවුනු ගොඩක් දේවල් Linux ගැන තමයි ලිව්වේ. ඉස්සරහටත් ඒ වගේ දේවල් ගොඩක් ලියන්න බලාපොරොත්තු වෙනවා. දැන් 2වසරෙ හින්ද වැඩ වැඩි එකයි එකම අවුල (ඉස්කොලෙ 2වසර නෙමෙයි හොඳේ). ඒ ඇරෙන්න බ්ලොග් එකේ වල් පල් නොලිව්වම නෙමෙයි. අපි කව්රුත් අපේ සුන්දර අත්දැකීම් බෙදා හදා ගන්න කැමතියිනේ. කැම්පස් ජීවිතේ කියන්නෙ බොහොම සුන්දර දෙයක්නේ ඉතින් ඒ සුන්දර දෙවල් වලින් ටිකකුත් මම ඔයගොල්ලොත් එක්ක බෙදා හදා ගත්තා. මේ ලඟදි මම මගේ හිතේ තිබුන දේවල් කිහිපයකුත් නිසඳැස් විදිහට(මම දන්න විදිහට ඒවාට කියන්නෙ නිසඳැස් කියල. එහෙම නොවෙනවනම් සොරි වෙන්න ඕන) බ්ලොග් එකේ ලිව්ව. අන්තිමට ලියපු එක නම් ටිකක් abstract මදි උනාද මන්දා. ඒ නිසා දැන් මට කැම්පස් එකේ කනක් ඇහිලා ඉන්න නැති වෙලයි ඉන්නේ :"> .

බ්ලොග් ලියනකොට මම කවදාවත් කාටවත් මඩ ගැහුවේ නෑ. මොකද මගේ ලිවීමේ අරමුණ මම දන්න දෙයක් අනෙක් අයටත් කියල දීල මගේ අත්දැකීම් අනෙක් අයත් එක්ක බෙදා හදා ගැනීම මිසක් කාටවත් මඩ ගහල කව්රුවත් විවේචනය කිරීම නොවෙන නිසා. සමහර වෙලාවට විවිධ පුද්ගලයො මට මම ඉගන ගන්නා තැනට කැත විදිහට මඩ ගහල මාත් එක්ක පැටලෙන්න හැදුවත් මම මගේ බ්ලොග් එක ආපහු ඔව්න්ට මඩ ගහන්න පාවිච්චි කලේ නෑ. එහෙම ඉන්න පුළුවන් වීම ගැන මම අද සතුටු වෙනවා=; .

ඉතිං අන්තිමට ආයෙත් මතක් කරනවා මට උදව් කරපු ධෛර්ය දීපු හැමෝවම. ඉස්සරහටත් රවින්දගේ සටහන් පොත එක්ක රැඳිල ඉන්න කියල ආරාධනා කරනවා. ;;)

~~බොහොම ස්තූතියි~~

මට දෙන්න නුඹේ එක සිනහවක්......

එපා මට නුඹේ ඔය සිනිඳු සුරත මා සුරතේ පටලා ගන්නට
දැනුනත් එවිට මට මුළු ලොවම මගෙ ලඟ බව
මට එපා නුඹේ තොල් පෙති සිඹින්නට
පළමු හාදුවෙන් තෙමන්නේ තොල් පෙති විතරක් උනත්
මට ඕනෑ නෑ නුඹේ ලමැද සැතපෙන්නට
දුන්නත් එය උණුසුම් යහනක සුව
ඒත්
මට දීපන්
නුඹේ එක අහිංසක සුන්දර සිනහවක්
මා සිත සතුටින් පිරීයාවි වෙන කිසිවකින් කල නොහැකි සේ
මන්ද යත්
එයයි මා පැතූ ආදරය....

Ubuntu අළුත් කෝලා වළහා සංස්කරණය ගැන

මේ මාසෙ 29 වෙනිදා Ubuntu වලට ආදරය කරන්නන් බොහොම උනන්දුවෙන් බලන් ඉන්න දවසක්. ඒ මොකද කියනවනම් Ubuntu වල අළුත්ම සංස්කරණය වන Ubuntu 9.10 හෙවත් Karmic Koala නිළ වශයෙන් නිකුත් වෙන්නෙ එදාට තමයි. මේ දවස් වෙනකොට මේ Karmic Koala කේත නාමයෙන් හඳුන්වන සංස්කරණයේ Beta නිකුත්වක් එළි දක්වල තියනවා. කැමති අය ඉන්නවනම් බාගෙන වැරදි අඩුපාඩු සොයන්න පුළුවනි.

ඔය Ubuntu 9.10 එහෙම කියල ලැබෙන හැටි දන්නවද? ඔතන 9 කියන්නෙ 2009 කියන එක. 10 කියන්නෙ දහවෙනි මාසෙ කියන එක. සාමාන්‍යයෙන් Ubuntu වර්ශයකට සංස්කරණ දෙකක් නිකුත් කරනවා. එකක් අප්‍රේල් මාසෙ(9.04) අනික ඔක්තෝම්බර මාසෙ. අනිත් දේ තමයි මේ සංස්කරණ වලට කේත නාමය දෙන්නෙ සතෙකුගේ නමින්. ඉස්සර ඉඳල මේ සංස්කරණ ආපු නම් දකින්න කැමතිද?

• Ubuntu 4.10(Warty Warthog)
• Ubuntu 5.04(Hoary Hedgehog)
• Ubuntu 5.10 (Breezy Badger)
• Ubuntu 6.06 LTS (Dapper Drake)
• Ubuntu 6.10 (Edgy Eft)
• Ubuntu 7.04 (Feisty Fawn)
• Ubuntu 7.10 (Gutsy Gibbon)
• Ubuntu 8.04 LTS (Hardy Heron)
• Ubuntu 8.10 (Intrepid Ibex)
• Ubuntu 9.04 (Jaunty Jackalope)
• Ubuntu 9.10 (Karmic Koala)

කළින් සංස්කරණයේ Jaunty Jackalope කියන්නෙ ජේත්තුකාර හාවා කියන එකනේ. මේ පාර Karmic Koala කිව්වට මට තාම Karmic කියන වචනේ තේරුමක් හොයාගන්න බැරි උනා. මොකක් හරි කෝලා වලහෙක් ගැන තමයි කියනනෙ. මමත් අද රෑ කැම්පස් එකේදි මෂියර්ගෙ(තරිඳු) ලැප ඉල්ලගෙන wifi වලට පිං සිද්ධ වෙන්න විනාඩි 25කින් විතර beta iso එක බා ගත්ත. ඊට පස්සෙ හිමීට Virtual Box එකට දාල බැලුව. Virtual Box එකේ උනත් විනාඩි 20කින් විතර ස්ථාපනය උනා. මුලින්ම දැක්ක වෙනස තමයි boot screen එක වෙනස් කරල තියනව.

ඒගොල්ලො නම් කියන්නෙ ලස්සන කලා කියල. මට නම් එහෙම පේන්නෙ නෑ.installation එකෙත් වැඩි වෙනසක් නෑ. window වල පොඩි පොඩි වෙනස් කම් කරල තියනව.

installation process එක පෙන්නන තැන නම් පැහැදිල වෙනසක් කරල තියනව. Ubuntu ගැන සහ අඩංගු සමහර මෘදුකාංග ගැන කෙටි විස්තරයක් පෙන්නනව මෙතනදි.

ඔන්න install වෙලා ඉවරයි desktop එකට ආව.

මේ අළුත් සංස්කරණයේද ඔවුන් හඳුන්වාදෙන දේවල් විදිහට කියන්නෙ මේව.


1. Boot Experience - මම කලින් කිව්ව Splash screen එකයි මේ.

2. Software Centre - කලින් තිබිච්ච Add/Remove වෙනුවට මේකෙ තියෙන්නෙ මේක

කලින් තිබිච්ච විදිහ හොඳයි මටනම්.

3. GOME 2.28 Desktop Environment එක.

• Pidgin වෙනුවට Empathy Default IM client විදිහට ඇතුලත් කරල තියනව.

4. Linux 2.6.31-11.36 kernel එක මෙයට ඇතුලත්.

5. 9.04 වල තිබුනු ප්‍රධාන performance ප්‍රශ්න විසඳමින් vedio driver එක EXA acceleration mode එකේ ඉඳල අළුත් UXA එකට වෙනස් කරල තියනව.

6. Ext4 file system එක පෙරනිමියෙන් ඇතුලත්.

7. Grub2 පෙරනිමි boot loader එක විදිහට ඇතුලත්.

ඉතිං හැමෝටම ආරාධනා කරනවා 29 වෙනිදට Ubuntu 9.10 original සංස්කරණය බාගත කරගෙන ඒ අත්දැකීම විඳගන්න කියල.

ඔබේ පරිගනකයට නිවැරදිව Ubuntu ස්ථාපනය කරගනිමු.

ගොඩක් කාලෙකට පස්සෙ මම ආයෙත් technical post එකක් ලියන්නයි යන්නෙ. මේ මම ටික කාලෙකට කලින් වෙච්ච පොරොන්දුවක්. කැම්පස් එකේ ඇකඩමික් වැඩයි තව අපේ පොඩි එවුන්ගේ වැඩයි(ඒ කිව්වෙ අපේ jouniorsලාගේ) නිසා මේක ලියන එක දවසින් දවස කල් යමිනුයි තිබුනේ. අනිත් එක පහුගිය දවස් වල වයිරස් උණක් හැදිල ජීවිතේ එපා වෙලා හිටියෙ. දැන් යන්තම් හොඳයි. හරි හරි ඔන්න වල් පල් ඇති වැඩේට බහිමු.

ලිනක්ස් නවකයින්ට හොඳම මෙහෙයුම් පද්ධතියක්නේ උබුන්ටු. ඒත් සමහරු උබුන්ටු install කරගන්න හැටි හරියට දන්නෙ නෑ. මේක අමාරු දෙයක් නෙමෙයි මට තේරෙන විදිහට වින්ඩෝස් install කරනවටත් වඩා මේක ලේසියි. ඒක ඔප්පු කරන්නත් එක්ක උබුන්ටු පරිගනයක ස්ථාපනය කරගන්න විදිහ තමයි මේ කියන්න යන්නෙ.මුලින්ම තමන් සතුව Ubuntu CD/DVD එකක් හෝ Super Ubuntu DVD එකක් තියෙන්න ඕන.

ගොඩක් අයගේ hard disk එකේ ජනේලයක්(windows) හයි කරලා තියෙන්න පුළුවන්නේ :-> . එහෙම නම් මුලින්ම ඒ අය ලිනක්ස් ස්ථාපනය සඳහා partition එකක් නිදහස් කරගන්න ඕන. 10GB තිබ්බනම් ඉහටත් උඩින්. අපි මෙහෙම හිතමු තියෙන්නෙ 40GB partition 3ක් නම්. අවුලක් නෑ. එක partition එකක් free කරගන්න. Mycomputer right click කරලා Manage ගිහින් ඒකෙන් disk management යන්න. ඔබේ දෘඩ තැටිය දැනට partition වෙලා තියන හැටි එතනදි පෙන්නාවි. දැන් අර හිස් කර ගත්තු partition එක delete කරලා එතන 30GBක partition එකක් හදාගන්න. තව 10ක් ඉතිරිනේ partition නොකරපු space එක විදිහට ආන්න එතනට තමයි අපි උබුන්ටු දාන්න යන්නෙ. මුළු hard disk එකම erase කරලා ලිනක්ස් විතරක් දාන්න යන අය ඉන්නවනම්(මේ මම වගේ) මේ මුකුත් කරන්න ඕන නෑ කෙලින්ම ඊළඟ පියවරට යන්න පුළුවන්.

දැන් අදාල Ubuntu තැටිය පරිගනකයට ඇතුල් කරලා ක්‍රියාත්මක කරන්න. මතක ඇතුව first boot device එකට CD/DVD ROM එක දාලා තියන්න. දැන් පරිගනකය CD එකෙන් boot වෙමින් මේ වගේ screen එකක් පෙන්නාවි.

default select වෙලා තියන english ම තියෙන්න ඇරල enter කරන්න(කඩ්ඩ හොඳටම තේරෙන්න ඕන නෑ යංතං සංතං ඇති :D). එතකොට පහත window එක ඔයගොල්ලොන්ට ලැබේවි.

Ubuntu install වෙනකම් පොඩි game එකක් එහෙම ගහන්න කැමති නම් පළවෙනි option එක තෝරන්න නැත්නම් දෙවනි එක තෝරගන්න. පළවෙනි එක තෝරපු අය පහල පින්තූරෙ වගේ සාමාන්‍ය ubuntu desktop එකකට ඒවි.මේ OS එක live CD එකෙන් boot වෙලයි තියෙන්නෙ. සාමාන්‍ය ubuntu ස්ථාපිත මැෂින් එකක කරන ඕන දෙයක් මේකෙත් කරන්න පුළුවන්. හැබැයි ටිකක් හිමීට වැඩ මොකද තනිකරම RAM එකෙන් වැඩ කරන නිසා.

දැන් ඔය install කියන icon එක තෝරන්න. දැන් ලැබෙන window එක තමයි අර මුල් menu එකෙන් install ubuntu තෝරපු අයට desktop එකට එන්නෙම නැතුව ලැබෙන්නෙ.

default එන විදිහටම English තියෙන්න ඇරල forward click කරන්න. පස්සෙ ඕන නම් සිංහලට මාරු කරගන්න බැරියැ. දැන පල්ලෙහා image එකේ වගේ window එකක් ලැබේවි.

Region සහ City දෙක රූපයේ විදිහට තෝරලා Forward යන්න.

මෙහේ සාමාන්‍යයෙන් තියෙන්නෙ USA layout එක තියන keyboard නේ. ආයෙ Fordward කරන්න. එපා වෙනවා නේද මොන්ටිසෝරි වැඩක් වගේනේ. :D

මෙතනින් මතක ඇතුව Specify partitions manually කියන අවසාන option එක තෝරල forward කරන්න.
දැන් තමයි කල්පනාවෙන් වැඩ කරන්න ඕන. මෙතන ඔබේ hard disk එක දැනට partition වෙලා තියන විදිහ සහ ඒවායේ විස්තර පෙන්නනවා.ලිනක්ස් OS එකක් install කරද්දි මූලිකවට swap area එකත් root partition එකත් හදා ගන්න ඕන. අපි කලින් ඉතිරි කරලා තියපු 10GBක free space කොටස තෝරන්න. (අළුත්ම hard එකක් පාවිච්චි කරන අය මුලින්ම /dev/sda තෝරල create new partition කියන තැන click කරන්න.)දැන් new partition කියන button එක click කරන්න. එතකොට පහත පින්තූරෙ වගෙ එකක් ලැබේවි.

swap එකේ size එක සාමාන්‍යයෙන් RAM එක වගේ දෙගුණයක් දෙන්න කියලයි කියන්නෙ. ඒත් 2GB වගේ RAM තියන අය ඒ වගේ දෙගුණයක් දෙන්න එපා. උපරිම 1000MB swap එකට දුන්නම ඇති. පහල use as කියන තැනින් swap area කියන එක තෝරල OK කරන්න.
ඊළඟට ඉතිරි free space එක තෝරල ආයෙ new partition ගිහින් අවම 8GB වගේ වෙන්න ext3 partition එකක් හදා ගන්න. මේක use as කියන තැනට / දෙන්න ඒ කියන්නෙ root. කැමති නම් /home එක වෙනම හදල දෙන්නත් පුළුවන්. එතකොට ආයෙ linux install කරන්න උනොත් තිබ්ච්ච data වලට හානියක් වෙන්නෙ නෑ. මම කලින් කිව්ව වගේ ඔය ගොල්ලො වින්ඩෝස් වල 30GB විතර partition එකක් delete කරල linux වලට partition හැදුව නම් තව සෑහෙන ප්‍රමාණයක් free space විදිහට ඉතිරි ඇතිනේ. ඒක තියෙන්න අරින්න පස්සෙ ඒක වින්ඩෝස් වලින් ntfs වලට format කරගන්න. අනිත් දේ තමයි දැන් මෙතන අළුත් partiton පෙන්නුවට තාම hard එකේ partition හැදිල නෑ. preview එකක් විතරයි පෙන්නන්නෙ. තව ඉස්සරහදි උබුන්ටු install කරන්න දුන්නහම තමයි මේව disk එකට save කරන්නෙ. දැන් partiton හදල ඉවර නම් forward යන්න.

දැන් ලැබෙන window එකේදි නම username එක passward එක එහෙම දීල forward යන්න. auto login දෙන්න එපා. එක භයානකයි එතකොට ඕන කෙනෙකුට machine එකට log වෙන්න පුළුවන්.

අන්තිමට අපි දීපු ඔක්කොම තොරතුරු සාරාංශ කරල නිවැරදිද කියල අහනව install කරන්න කලින් මෙතනින් install කියල දුන්නම අර partition එහෙම හැදිල OS එක install වෙනව.

මේක install වෙන්න යන වෙලාව machine එකේ processer speed එක RAM එක මත වෙනස් වෙනව. Core2Do වගේ එකක නම් විනාඩි 12කින් විතරත් install වෙනව. අර මුලින් live cd එකෙන් machine එක boot කරගෙන install කරපු අයටනම් OS එක install වෙනකම් game එකක් ගහන්නත් පුළුවනි.

install වෙලා ඉවර උනහම restart කරන්න කියල massage එකක් ඒවි. එතකොට restart click කරන්න. CD තැටිය ඉවත් කරන්න කියල machine එක restart වේවි. ඔන්න ඔයගොල්ලෝ Ubuntu නිවැරදිව ස්ථාපනය කරගෙන ඉවරයි. වින්ඩෝස් install කරනව තරම් අමාරු නෑ නේද. මේ පෝස්ට් එක ටිකක් විතර අච්චාරුවක් වගේද මන්දා :D. පිළිවෙලටම ලියන්න තරම් වෙලාවක්නෑ. ඒකට සමාවෙන්න. අර්බුදයක් තියනවනම් comment එකක් දාල යන්නකෝ.

දැන් ඉතින් මම කලින් ලිව්ව post වල විදිහට කැමති විදිහට ubuntu හැඩ කරගන්න එකයි තියෙන්නෙ.

• Ubuntu අයිසිං කිරීම(1 කොටස)
• Ubuntu අයිසිං කිරීම(2 කොටස)-Compiz Fusion
• Ubuntu අයිසිං කිරීම(3 කොටස)-Screenlets
• Ubuntu අයිසිං කිරීම(4 කොටස)-Cairo-Dock
  

මඩොල් දූවට විනෝද චාරිකාවක්.....

අපේ ගාලු චාරිකාවෙ දෙවනි කොටසයි මේ ලියන්න යන්නෙ. දෙවනි දවසෙ අපි හිතාගෙන හිටියෙ මූලිකවම මඩොල් දූවෙ යන්නත් මුහුදෙ නාන්නත්. මොකද අපේ නුවර සගයො දෙන්නට මුහුදෙ නානකම් ඉවසුමක් නෑ. අපි මේ මඩොල් දූවෙ ගිහිපු මේ විස්තරේ අනාගතයෙ මඩොල් දූවට විනෝද චාරිකාවක් එන්න හිතාගෙන ඉන්න අයටත් ප්‍රයෝජනවත් වේවි කියල හිතනවා.

දෙවනි දවසෙ උදේම(ඒ කිව්වෙ 8ට විතර :D) අපි පිටත් උනා ගාල්ලෙන්. අපිට ප්‍රවාහන පහසුකම් දෙවනි දවස සඳහා සැපයුවෙ සිංහගිරි ව්‍යාපාර සාදර අනුග්‍රහයෙන් කියල මතක් නොකලොත් ඒක ලොකු අඩුවක්. එක එල්ලෙගෙ town ace වෑන් එක තමයි අපි ගමන යන්න පාවිච්චි කලේ. මම වාහනේට නගින කොට හිටියෙ එල්ලෙයි අත්තයි කිරයි විතරයි. සූටියාව ගන්න අපි උන්ගෙ ගෙදරට ගියා. ආරංචි උන විදිහට මිනිහා තුන් හතර පාරක් නාලා තව පැයක් විතර හැඩ උනාලු. කොහේ යන්නද කියල පස්සෙ කියන්නම්.අපිත් එක්ක ඊළඟට එකතු උනේ පොත්තා(හිරන්ත).ඌ පාරට ඇවිත් ඉඳලා හබරාදුව බස් ස්ටෑන්ඩ් එක ළඟිනුයි වාහනේට නැග්ගේ. ඊළඟට අපි අහංගම බූලීගෙ(රවීන්) ගියේ අහංගම බුලීගෙ ගෙදරට. මිනිහා මාර පොෂ් උනාට මොකද ගෙදරට යන පාර නම් අන්තිමයි. බුලීගෙ අම්මා හදල දීපු පළතුරු යුෂත් රස බලලා අපි මඩොල් දූවට යන්න පිටත් උනා.

අහංගම ඉඳලා කොග්ගලට යන්න ආපස්සට ගාල්ල පැත්තට එන්න ඕන. කොග්ගලට ලඟම ඉන්නෙ පොත්තා නිසා අපි පොත්තගෙන් ඇහුවා බෝට්ටු තොටුපලකට යන්න තැනක්. ඌ කියාපි මම නම් එහෙම තැනක් දන්නෙ නෑ බං. ඔය ඉස්සරහින් හරවපන් කියල. අපි හරවපු තැන තමයි ගාල්ල පැත්තෙ ඉඳල එනකොට කොග්ගල් ඔය හරහා යන පාලම පහු උනාම තියනවා අතහැරල දාපු පාසලක්. එතනින් තියන මඩොල් දූවට කියන බෝඩ් එක ගාවින් තමයි හරවන්න ඕන. අවම මුදලකින් හොඳම චාරිකාවක් යන්න නම් මේ අපි ගිහිපු තැනින්ම මඩොල් දූවෙ යන්න කියල ඉස්සරහට යන්න ඉන්න අයට මතක් කරන්න කැමතියි. එතනින් කෙලින්ම බෝට්ටු තොටුපලට යන්න පුළුවන්. එතන හිටපු කෙනාගෙන් අපි ඇහුවාම ඔහු කිව්වෙ මඩොල් දූවට යන්න රු600ක් සහ දූපත් 5ක චාරිකාවක් යාමට රු2000ක් බව. මීට කලින් කොග්ගල් ඔයේ දූපත් 5ක චාරිකාවක් ගැන අහල නොතිබුනත් අපි ඒක යන්න කල්පනා කලා. අපේ බෝට්ටු පදවන්නා උනේ නිශාන්ත අයියා.

කළු පාට පරණ දුම්රිය පාරට යටින් අපි චාරිකාව ආරම්භ කලා. මුලින්ම අපි ගියේ දුරම තැනට. ඒ කුරුඳු දූවට. කුරුඳු දූව කියන නමින්ම තේරෙනවනේ මේ දූපතේ පුරාම තියෙන්නෙ කුරුඳු. මේකෙ පවුල් හතරක් ජීවත් වෙනව. ඔවුන්ගෙ ආදායම් මාර්ගය වෙන්නෙ කුරුඳු. මේ දූපතේ තියන කුරුඳු ගස් අවුරුදු 100කට වඩා පරණයි කියල තමයි නිශාන්ත අයියා කියන්නෙ. කුරුඳු ගහක කඳ දැක්කහම අපිටත් ඒ කතාව ඇත්ත වෙන්න ඇති කියල හිතුන.

මේවට කවදාවත් පොහොර යොදල නෑ කියනවනේ. කුරුඳු කෝට්ට හැදුනහම කපා ගන්නයි තියෙන්නෙ. අපි ඉතිං මේ දූපතේ ගෙදරකට ගොඩඋනා. ඒ ගෙදර අයිතිකාර මාමා අපිව බොහොම සුහදව පිළිගත්තා. ඉන් පස්සෙ කුරුඳු කෝට්ටකින් පොත්ත ගලව ගන්න හැටිත් අපිට පෙන්නුව.

මෙච්චර ගාල්ලෙ ඉඳලත් කුරුඳු පොතු ගහන හැටි එදා තමයි දැක්කෙ. මුලින්ම කොළ පාට කුරුදු පොත්ත උපකරණයකින් සූරල ඉවත් කරනවා. ඉන් පස්සෙ තව උපකරණයකින් කෝට්ට පිරිමදින්නෙ පොත්ත බුරුල් වෙන්නලු. අන්තිමට පිහියක් වගේ උපකරණයකින් ලස්සනට මුලු පොත්තම ඉරෙන්නෙ එහෙම නැතුව ගලව ගන්නවා. ඒක මඳ අව්වෙ වේලුවාම තමයි අපි කෑම වලට දාන කුරුඳු පොතු ලැබෙන්නෙ. කට්ටිය අහල තියනවද කුරුඳු තේ. අපිට නම් කුරුඳු තේ සංග්‍රහයකුත් බුක්ති විඳින්න ලැබුනා.

පැණි රස නම් නෑ සීනි එහෙම දාන්නෙ නෑනෙ. හැබැයි ගුණයිලු. එතනින් පිටත් උන අපි දූපත වටේ රවුමකුත් ගැහුව. ඒ අතර හමුබුන එල්ලෙන ඇඳක පොඩි ඇලට් එකක් දාන්නත් අමතක කලේ නෑ.

කුරුඳු දූවෙන් නික්මිලා අපි ඊළඟට යන්න පිටත් උනේ ආරණ්‍ය දූවට. ඒ යන අතර අපේ අත්තාට ඕන උනා බෝට්ටුව පදවන්න. නිශාන්ත අයියගෙන් සුක්කානම ඉල්ල ගත්තු අත්තා දැන් බෝට්ටුව පදිනවා.

ඉස්සරහ තියන දූපතක් පෙන්නලා නිශාන්ත අයියා කිව්වා අර දූපත එල්ලෙ යං කියල. ඒත් අපිට තේරුන විදහිට නම් බෝට්ටුව යන්නෙ නයා විදිහට. හිටපු ගමන් එක පැත්තට හැරෙනවා අපි කෑ ගහනකොට ආයෙ අනෙක් පැත්තට හැරෙනවා. ඒ විදිහට තමයි ගියේ. කොහොම හරි ආරණ්‍ය දූවට කිට්ටු වෙනකොට නිශාන්ත අයියා ආයෙ සුක්කානම් ඉල්ල ගත්තා.මොකද ඒ හරියෙ තියනවලු වතුරෙන් උඩට මතු නොවෙච්ච වතුර මට්ටමේ වගේ තියන ගල් කුළු.ඒ එකක් උඩින් බෝට්ටුව ගියොත් ඉවරයි. ඉතින් නිශාන්ත අයියා අපිව පරෙස්සමින් ආරණ්‍ය දූවට එක්කගෙන ගියා. මේ දූපතේ තියෙන්නෙ හාමුදුරුවරුනට භාවනා කරන්න හදපු කුටි සහ කුඩා පංසලක්. දූපතේ පරිසරය කොච්චර නිස්කලංක ද කියනව නම් ඇහෙන්නෙ කුරුල්ලන්ගෙ අනෙක් සත්තුන්ගෙ සද්ද විතරයි. අපි දූපතේ ඇවිදින අතර ස්වාමීන් වහන්සේ නමක් අපි ලඟන් ගියත් උන්වහන්සේ අපි ගැන පොඩි හරි අවධානයක් යොමු නොකර බිම බලාගෙන වැඩම කලා. අපි කට්ටියගෙ පැමිණීම භාවනායෝගීම ඉන්න ස්වාමීන් වහන්සේලාට කරදරයක් වෙන්න පුළුවන් කියල තේරුන නිසා අපි ඉක්මනට ආයෙ බෝට්ටුවට ආව.

ඊළඟට කොහාටද යන්නෙ? ඒ අපෙන් ප්‍රශ්නය නිශාන්ත අයියට. අපි ඊළඟට බහින්නෙ ගල් දූවට. හැබැයි කුරුළු දූව ළඟින් යනවා. නිශාන්ත අයියා එහෙම කිව්වෙ. කුරුළු දූවට බහින්න බැරි නිසා. කුරුළු දූව කියන්නෙ කුරුල්ලන්ටම වෙන් වෙච්ච දූපතක්. ඒකට කව්රුත් ගොඩ බහින්නෙ නෑ. අපි ගිහිපු වෙලාව දවල් නිසා ඒ වෙලාවට කුරුල්ලො නෑ කියලයි නිශාන්ත අයියා කිව්වෙ. ඒක නිසා ගහ කොලින් පිරිච්ච කුරුළු දූව ළඟින් යනගමන් බලාගෙන අපි ගල් දූව දිහාවට යාත්‍රා කරා. ආ කියන් අමතක උනානේ මේ ටිකේ අපේ රියදුරා උනේ පොත්තා. ඌට බෝට්ටු පදින්න දොළ දුකක් හැදුනනේ හිටපු ගමන්. පොඩි එකාගෙ ආසාවනේ ඔන්න ඌටත් දුන්නා බෝට්ටුව පදින්න. හැබැයි උගෙත් ගමන නයා තමයි.

ඊළඟට අපි ලං වුනේ ගල් දූවට. නමින්ම තේරෙනවනේ මේක ගල් වලින් හැදිච්ච දූපතක්. නිශාන්ත අයියා බෝට්ටුව බොහොම පරෙස්සමින් හිමීට ගල් දූව දිහාවට ලං කරා.

මේ හරියෙ වතුර යට ගල් කුළු සෑහෙන්න තියනවලු. සමහරක් තැනක වතුර නිකම්ම ඉහලට විසි වෙනවා දකින්න පුළුවන් ඒ අර වතුර මට්ටමේ තියන ගල් වල දිය රැලි වැදුනහමයි එහෙම වෙන්නෙ. කොච්චර ප්‍රවේසමෙන් හෙමින් බෝට්ටුව ගල් දූවට ලං කරත් දූපත ළඟටම යන කොට ගලක් දෙකක් බෝට්ටුවෙ අඩියෙ වැදිලා හීරීගෙන යන සද්දෙ අපට ඇහුනා. අන්තිමට දූපතේ ලොකු ගල් දෙකකට බෝට්ටුව හේත්තු කරල නිශාන්ත අයියා ඒ ගලක් උඩට බැහැල බෝට්ටුව අල්ල ගත්ත. මේ ඔයේ මැද හරිය නිසා මේ හරියෙ වතුර කැළඹිලි සහිතයි ගැඹුරුයි. ඒ නිසා අත ඇරියොත් බෝට්ටුව ගහගෙන යන නිසා නිශාන්ත අයියා බෝට්ටුව අල්ලගෙන එතනටම වෙලා හිටියා. ඇඟ කිලි පොලා යන කතාවකුත් නිශාන්ත අයියා කිව්වේ මේ අතරෙ. මල්ලිලා ඔය ගල් වල වටේටම කාවාඩි එල්ලිලා ඉන්නවා. ඒ නිසා ගල් උඩ යනකොට බලාගෙන වැටුනොත් කාවාඩි වලට පළලා යනවා. කෙලින්ම ඉස්පිරිතාලෙ තමයි. මේ කතාව අහලා අපි වතුරට එබිලා බැලුවා. ඇත්ත තමයි මේ ඉන්නෙ ගල් වටේටම වතුර මට්ටමේ දැති දැති පිහියක් වගේ. මේක දැකපු ගමන් බැහැලා හොඳට කකුල් දෙකෙන් හිටපු එවුන් පහත් වෙලා අත් දෙකත් බිමට තියා ගත්තා වැරදිලාවත් නොවැටෙන්න. කොහොම හරි කකුල් හතරෙන්ම ගලින් ගලට ගිහිල්ලා පින්තූර කීපයකුත් ගත්තා.

මේ පෝස්ට් එකේ නම මඩොල් දූවට ගමනක් නේ. කට්ටිය බලනව ඇති දැන් මඩොල් දූවට යන්නෙ නැද්ද කියල වෙන හතර වටේ ඇවිදින්නෙ. ගියා ගියා අන්තිමට ගියේ මඩොල් දූවට.අපි මඩොල් දූවට එනකොට කට්ටියක් ඉන්නවා ගොඩ දිහාව බලාගෙන. නිශාන්ත අයියා කිව්වා ඔයගොල්ලො වෙන තැනකින් ආවනම් ඕගොල්ලොන්ටත් වෙන්නෙ ඕක තමයි කියල. වෙන බෝට්ටු තොටුපලවල් වල මඩොල් දූවට විතරක් එන්න රුපියල් 1200ක් විතර ගන්නවා. ඒකත් මඩොල් දූවට ගෙනත් දාලා බෝට්ටුව යනවා ආයෙ පැයකින් වගේ එන්නම් කියල. මඩොල් දූවෙ ඇත්තටම පැයක් බලන්න දේවල් නෑ. ඒ මිනිස්සු ඉතින් අන්තිමට ගොඩ දිහා බලාගෙන ඉන්නවා බෝට්ටුව එනකම්. ඒත් නිශාන්ත අයියලාගේ බෝට්ටු සේවාව එහෙම නෑ. කොතනට ගියත් කට්ටිය ආපහු එනකම් ඔවුන් බෝට්ටුව තියාගෙන ඉන්නවා. ඕන වෙලාවක. ඒ නිසා ඔය කට්ටිය මඩොල් දූව බලන්න යනවනම් එහෙම මම කියපු මගසළකුණු වල විදිහට නිශාන්ත අයියලගේ බෝට්ටු තොටුපලටම යන්න. මම කලිනුත් කිව්වනේ මඩොල් දූවෙ බලන්න වැඩි දෙයක් නෑ කියල.

මඩොල් දූව කතාවෙ කියවෙන තරම් විශාල දූපතක් නෙමෙයි මේක. ළඳු කැලේ හරහා අඩි පාරවල් තියනවා. ගොඩ කරපු ළිඳකුත් සෙක්කු ගලකුත් විතරමයි මුළු දූපතටම තිබුනේ. මේ සෙක්කු ගල ඇතුලට කැමරා එක දාලා අපි ubuntu ඡායාරූපයකුත් ගත්තා.

දැන් නම් මේක දිග වැඩියි වගේ ඒ නිසා ඉක්මනට ඉවර කරනවා. අපි දවල්ට කෑවේ සූටියාගෙ පවුලගෙ ඒ කියන්නෙ කෙකරි(නිරාශා) ගෙ ගෙදරින්. හවස ගියා පොල්හේනෙ නාන්න. ඒ යන ගමන් වල්ගමින් කැව්ලාවත් සෙට් කර ගත්තා. මිනිහා නැතුව මාතර මොකුත් කරන්න බෑනෙ ඉතින්. ආ අපේ නුවර කට්ටිය හිතේ හැටියට මුහුදෙ නෑව.

වැඩිය නෑ පැය 3 1/2ක් විතර.අන්තිමට ගියේ අපේ බැච් එකේ කුඩාම සාමාජිකාවකගේ ගෙදර. ඒ කොයිල්ගේ(ආලෝකා) ගෙදර. අපරාදේ කියන්න බෑ අපි එන නිසා කෑම බීම ගොඩක් ගෙනල්ලා තිබුනා. අපිත් ඉතින් ඒව අපතේ යන්න ඇරියේ නෑ. මේසෙට තියපු හැම පිඟානක්ම ඉවර කලා.

එහෙනම් ඉතින් මේ දිගම දිග පෝස්ට් එක ඉවර කරන්නයි හදන්නෙ. කොහොම හරි කියන්න ඕන මැක්සා ට්‍රිප් එක.

ගාල්ල වටේ අපේ විනෝද චාරිකාව.......

ගොඩක් කාලෙකට පස්සෙ පොඩි නිවාඩුවක් හම්බුනා. වැඩිය නෑ සතියයි. ඉතින් මේ නිවාඩුවේ අපි තීරණය කලා අවුරුද්දකට විතර කලින් ඉඳන් යන්න හිතන් හිටපු විනෝද චාරිකාව යන්න. අපේ බෝඩිමේ ඉන්න උඩ රට සගයෝ දෙන්නට තිබුනා ගාලු එන්න ලොකු උවමනාවක්. ඉතින් තව අහල පහල අයත් එකතු කරගෙන ගාල්ලෙ වටේ රවුමක් යන්නයි අන්තිම තීරණය උනේ. අපේ trip එකේ පළවෙනි දවස ගැනයි කියන්න යන්නෙ. පින්තූර ටිකකුත් එකතු කරනවා. බලන්න කොහොමද කියල.

ඔන්න ඉතින් ගිය 22 ඉරිදා උදේ අත්තා(එරංග), කිරා(සමීර), එල්ලේ(කල්ප) තුන් දෙනා ගාල්ලට සම්ප්‍රාප්ත උනා. උන්ව එක්ක එන්න මමත් සූටියත් ගියා ගාල්ලට. බලනකොට මුන් ටිකක් කලින් ඇවිල්ලා. මාතර ඉඳන් අපිත් එක්ක සෙට් වෙන්න ආපු කැව්ලා(චමිත්) තාම මග. මග කිව්වෙ වල්ගම.
ඒ කියන්න ඌ එතකොට බස් එකට නැගලවත් නෑ. ඉතින් ඌ ගාල්ලට එනකම් අපි කොටුව පැත්තෙ රවුමක් ගහන්න ගියා. කොටුවෙ දවල් දොලහට විතර ඇවිදින්න ටිකක් අමාරුයි තමයි. ඒත් මූදු හුළඟ නිසා දැඩි අව් රශ්මිය වැඩිය දැනෙන්නෙ නෑ.

කොටු තාප්පෙ දිගේ ටිකක් ඇවිදලා වැල්ලටත් බැස්සා කියමුකෝ. අත්තාගෙන් වදේ නාමු කියල. වැලිමඩ පැත්තේ මූද නෑනෙ ඒ නිසාද කොහෙද මූහුද දැක්ක වෙලාවෙ ඉඳල මිනිහගෙ කතාව නාමු නාමු නාමු තමයි :D. පස්සෙන්දා මූදෙ නාන්න සැලසුම් කරලා තිබුන නිසා බොහොම අමාරුවෙන් අත්තාව එක්කරගෙන ආව ගොඩට. පරක්කු වෙලා අපු කැවුලාවත් වාහනේට නග්ගගෙන කට්ටියම ආවෙ අපේ ගෙදර දවල් කෑමට. ඒ කිව්වෙ උළුවිටිකෙට. දවල් කෑම නම් අම්මා මරුවට උයල තිබුනා. මම මාස ගානකට පස්සෙ කාපු රසම කෑම වේල තමයි ඒ. රතු කැකුළු බත්,මෑකරල්,කිරිහැන්ද කොළ මාළුව,මඤ්ඤොක්කා එහෙම එක්ක කට්ටිය හුස්ම ගන්න බැරි වෙනකම් කෑවා. කොච්චර කෑවත් මොකද අර කොහොම හරි බඩේ ඉඩ ලැබෙන ජාතිය තමයි අතුරුපසට තිබුනේ.දන්නවනේ රජතුමා ආව වගේ තමයි. කොහොම හරි බඩේ ඉඩ අරගෙන ඒවත් කෑව කියමුකෝ දැන් ඇවිද ගන්නත් අමාරු ගානයි. එහෙම කියල කොහොමද හවස සැලසුම කොට්ටව නාන්න. හවස දෙකට විතර අපි කොට්ටව යන්න පිටත් උනා.

කට්ටියව එක්ක ගෙන අපේ ගෙදර එද්දිට වඩා කොට්ටව යන්න පිටත් වෙද්දි වාහනේ වැඩිපුර බරයි වගේ. අපේ වාහනේ Nissan AD wagon කියන ජාතිය. දැකල ඇත්නම් දන්නව ඇති වාහනේ කොහොමත් ටිකක් පහතයි.

අනික මුන් ටික ඉස්මුරුත්තෙට කාලනේ. ඒක නිසා වලවල් එහෙම පරෙස්සමට බේරන්න සිද්ධ වුනා. ඔන්න ඉතින් අපි කරාපිටිය තලගහ හරහා වලහන්දූවෙන් උඩුගම පාරට වැටිලා ඉස්සරහට ආවා. යන අතරේ කිරා කියනවා මචං සිරාවටම මේ පැත්තත් අපේ පැත්ත වගේමයි කියලා. අපි කල්පට නිතරම දෙන නෝන්ඩියක් තමයි උඩුගම ඩොටේ කියන එක. පොරගෙ ගම උඩුගම. මිනිහා කියව කියව හිටියේ බලපං අපේ ගමට යන පාර පට්ටයි නේද කියල හැබැයි කිරාගෙ කතාවෙන් කල්පයගෙ කට වැහුන. මොකද කිරා නාවලපිටියෙ =)). ඔන්න කොට්ටව තටාකෙට යන අතුරු පාරටත් අවා කියමුකෝ මේක කැලේ මැද්දෙන් තියන පාරක්. බැලූ බැල්මට ගල් මතුවෙලා මඩ වලවල් පිරිලා.

ලොරියක සෙනඟ පටවගෙන මේකෙ ගියොත් වාහනේ යට ඇනගන්න තමයි වෙන්නෙ ඒ නිසා අපේ හෑල්ලුම සාමාජිකයා සූටියා :P ඇතුලු කීප දෙනෙක් බස්සලයි වාහනේ අර පාරෙ අරගෙන ගියේ. වැඩි දුරක් තිබුනෙ නැති නිසා අවුලක් උනේ නෑ.

මේ තටාකේ කොට්ටව කැලේ මැද්දෙන් එක ස්භාවික වතුර පාරකින් තමයි පෝෂණය වෙන්නෙ. මුලින් මෙතන තිබිල තියෙන්නෙ ස්භාවිකවම හැදිච්ච පොකුණක් දැන් ඒක ටයිල් කරලා swimming pool එකක් වගේ හදල තියෙන්නෙ. එක පැත්තකින් වතුර පිරෙන ගමන් අනිත් පැත්තෙන් වතුර ඉවත් වෙන නිසා පිරිසිඳුයි. නාන්න කලින් කට්ටිය දඩ මස් වේලක් බුක්ති විඳින්න ලෑස්ති උනත් අධික මිල නිසා ඒක හරි ගියේ නෑ. මම නම් නෑනෙ ඔය පව් වැඩ වලට. කට්ටියම ඔන්න බැහැලා පීනන්න පටන් ගත්තා. පීනන්න බැරි අය පීනන්න පුරුදු වෙනවා. අනෙක් අය තරඟෙට පීනනවා.

ඔය අස්සේ කිරා පීනන අතර pool එකේ ගැට්ටේ නහය වද්දගෙන තුවාලත් කර ගත්තා. ඌටනේ හොඳටම පීනන්න පුළුවන්. ක්‍රම 5කට පීනතෑකි. ඒ ක්‍රම අතර බලු ක්‍රමෙත් තියනවා. ඌ ඒ විදිහට පීනලත් පෙන්නුවා. දැකල තියනවද බල්ලො පීනන හැටි. අත් උඩට එන්නෙ නැති නිසා සද්ද නැතුව පීනන්න පුළුවන්. කොහොම හරි කට්ටිය ගොඩට එනකොට 5 පහුවෙලා. ආ සූටියා pool එකේ පළළ පැත්තෙන් බාගයක් පීන ගත්තා. ඉතුරු බාගෙ ආයෙ දවසක.

ඊළඟට ආවෙ ගාලු කොටුවට. හවසට තමයි කොටුව ලස්සනම. කොටුව පන්සල ගාවින් පටන් අරගෙන ඉස්සරහ පැත්තට එනකොට රෑ වෙලා. මොකද ඉතින් දකින දකින එකේ පින්තූර ගන්නත් එපැයි. අනික අත්තට නියම කලාකාමී අදහස් තියෙන්නෙ. උඹ ඔහොම ඉඳපන් උඹ අර පැත්ත බලාගෙන ඉඳපන් ඔය විදහට කට්ටිය විනාඩි 10ක් විකර කට්ටිය සෙට් කරලා තමයි මෑන් photo එක ගන්නේ.

රෑ 8 විතර වෙලා තිබ්බ නිසා කට්ටියම ආව සූටියාගෙ ගෙදරට. ඒ බෙලිගහ හන්දියෙ. රෑට එහෙන් කාල. කට්ටියම කල්පගෙ ගෙදර ගියා. එහේ තමයි රෑ නවාතැන්. මම නම් ගෙදර ගියා මොකද නිවාඩු තියන ටික දවසෙත් ගෙදර නැති උනාම අම්මගෙ තාත්තගෙ හිතට හරි නැති නිසා. ඔන්න අපේ trip එකේ පළවෙනි දවස ඉවර උනා. මඩොල් දූව ගිහිපු හැටි එක්ක ඊළඟ post එකෙන් හම්බෙමු.